O vicepresidente da Deputación da Coruña, Xosé Regueira, visitou a nova oficina de información turística de Brandomil acompañado polo alcalde, Manuel Muíño, o presidente da Fundación Brandomil e o equipo técnico das escavacións arqueolóxicas. Durante a visita, Regueira supervisou os traballos na ponte romana e no xacemento da Pedra do Altar, onde, segundo o arqueólogo Lino Gorgoso, os últimos descubrimentos sinalan a existencia dunha antiga cidade romana baixo terra.
A Deputación confirmou o seu apoio ao Concello de Zas e á Fundación Brandomil para manter activa a oficina turística durante todo o ano, co obxectivo de reducir a estacionalidade e garantir a promoción do patrimonio local.
Brandomil, un lugar único
“Brandomil non só é historia, é tamén presente e futuro, por iso hai que divulgalo tamén entre a rapazada, que volverán despois cos seus pais a visitar este lugar único”, salientou Regueira.
Esta colaboración abre novas vías para a difusión e conservación do legado arqueolóxico da Costa da Morte, facilitando actividades e visitas en todas as estacións do ano e contribuíndo ao turismo sustentable e ao coñecemento dun dos enclaves máis singulares da comarca.
