A agrupación socialista de Muxía celebrará este sábado 30 de agosto o seu tradicional encontro anual. A cita terá lugar na antiga escola de Quintáns, a partir das 19.00 horas, trasladada a este espazo debido á previsión meteorolóxica.
Como novidade, o evento incluirá unha sardiñada popular. Os asistentes poderán adquirir un ticket de 7 euros, á venda a través dos concelleiros socialistas ou no propio recinto o mesmo día. O menú inclúe bebida, pan, broa, sardiñas, cachelos, sobremesa e café.
A dirección local explicou que, como mostra de agradecemento á boa acollida da iniciativa, a velada estará amenizada con música en directo.
O secretario xeral e portavoz municipal do grupo socialista, Iago Toba Campaña, intervirá no encontro para reafirmar o lema “Imparables”, co que a candidatura se presentou nas últimas eleccións municipais. Toba subliñará, segundo avanzan dende a organización, que o proxecto socialista “mantén a forza e a coherencia cos principios defendidos ante a veciñanza de Muxía”.
Desde o PSOE incidirán na “catastrófica xestión e engano” do goberno local actual.
Ao encontro están convocados veciños e veciñas, así como cargos socialistas da comarca e representantes das direccións provincial e nacional, configurando un espazo de convivencia, debate político e reencontro entre militancia e simpatizantes.
