San Fins do Castro (Cesullas-Cabana) volveu ser escenario dunha das romarías máis emblemáticas da comarca coa celebración da súa festa recoñecida como de Interese Turístico. Centos de persoas acudiron un ano máis a este encontro relixioso e festivo, no que o Berro Seco e o Santo da Pólvora volveron ser os actos centrais da xornada.
A celebración deu comezo cunha serie de misas e coa tradicional procesión, que deron paso ao esperado momento do Berro Seco. Este rito singular, no que os asistentes lanzan tres berros secos ao unísono, foi dirixido desde o palco polo cura de Cesullas. O acto, que evoca a forza e a unión dos antigos canteiros ao levantar pedras, continúa a ser un dos símbolos da identidade local.
Antes da festa, a devoción manifestouse tamén na Fonte Santa, situada ao pé da ermida. Desde primeiras horas da mañá, numerosos romeiros achegáronse ao manancial para lavar as mans e a cara coa súa auga, á que se lle atribúen propiedades curativas. Unha das tradicións máis arraigadas é deixar secar o pano de man ao sol tras mollalo na fonte, co convencemento de que, unha vez seco, pode curar verrugas ou mesmo a pulmoeira das vacas.
E non faltaron os romeiros e as populares merenda na contorna A sesión de tarde estivo amenizada polos grupos Maruxía e Os Enxebres, mentres que a verbena da noite correu a cargo das orquestras Alianza e Los Players.
As celebracións continuarán o sábado 2 de agosto, coa xornada dedicada á Nosa Señora dos Remedios. As dianas e alboradas correrán a cargo dos gaiteiros Maruxía. Ao longo da mañá celebraranse misas desde as 9.00 horas, destacando a misa solemne cantada pola Coral de Cesullas ás 13.00 h. A música continuará coa sesión vermú do grupo Ritmo, que tamén animará a verbena nocturna xunto ao dúo Charada.
