O representante do Partido Galego no Concello de Carballo, José Luís Bardanca Rojo, presentou unha moción na que solicita ao Goberno municipal que inste á Deputación da Coruña a acometer con urxencia a limpeza da estrada DP-1902, que conecta o núcleo urbano co núcleo costeiro de Razo. A formación propón que, de non asumir o ente provincial esta tarefa, o Concello asuma a limpeza cun acordo que permita repercutir os custes á Deputación coruñesa.
Na mesma proposta, o Partido Galego demanda a elaboración dun proxecto para a construción dunha senda peonil e un carril bici ao longo deste traxecto, co obxectivo de incluílo como obra prioritaria nun plan de actuacións da Deputación ou nun plan municipal específico.
Tamén se solicita a instalación de alumeado público en toda a vía entre Carballo e Razo, co fin de garantir a seguridade das persoas usuarias da futura senda peonil e do carril bici.
Desde o Partido Galego sinalan que estas actuacións foron recollidas en diferentes programas electorais do BNG nos últimos anos, mais aseguran que «nin se cumpriron nin se prevé que se leven a cabo», polo que reclaman unha resposta inmediata por parte do Goberno local.
