Os barcos son o Novo Viana, que resultou totalmente calcinado e o Apóstol, coa proa afectada polas lapas. As dúas embarcacións son de Camariñas.
Un pesqueiro ardeu por completo esta madrugada no porto de Brens, en Cee, e as lapas alcanzaron tamén a unha segunda embarcación, que resultou parcialmente afectada.
O 112 Galicia tivo coñecemento do incendio arredor das 04:00 horas, tras recibir a chamada dun particular que alertaba de que un barco estaba ardendo no peirao. Segundo indicou, cría que non había ninguén no interior da embarcación.
De inmediato, desde a sala de operacións do 112 Galicia informouse a Salvamento Marítimo, ao Servizo de Gardacostas de Galicia, aos Bombeiros de Cee, á Garda Civil e aos efectivos de Protección Civil da zona.
Unha vez no punto, os equipos de emerxencia confirmaron que o lume tamén estaba afectando a unha segunda embarcación próxima. As dúas estaban amarradas moi preto, o que facilitou a propagación das lapas.
As tarefas de extinción prolongáronse durante varias horas debido á elevada presenza de materiais como fibra e plástico, así como ao forte vento que dificultaba os traballos e reavivaba puntualmente o lume.
Finalmente, a primeira embarcación resultou calcinada por completo, mentres que a segunda sufriu danos na proa. O incendio está xa completamente extinguido e ambas embarcacións seguen a flote.
Os barcos son o Novo Viana, que resultou totalmente calcinado e o Apóstol, coa proa afectada polas lapas. As dúas embarcacións son de Camariñas.
Información e fotografías -AXEGA 112
