O PPdeG reivindica o esforzo da Xunta e dos concellos na conciliación fronte aos recortes do Goberno central
A secretaria xeral do Partido Popular de Galicia, Paula Prado, puxo este martes en valor o compromiso económico da Xunta e dos concellos galegos coa conciliación familiar, nun contexto marcado pola redución do financiamento estatal por parte do Goberno central.
Durante unha visita ao campamento de verán organizado polo Concello de Coristanco, grazas a unha achega autonómica de 50.000 euros, Prado denunciou que o Executivo de Pedro Sánchez recortou nun 25% a súa aportación ao Plan Corresponsables, o que supuxo que Galicia deixase de percibir 2,3 millóns de euros. Unha contía que, segundo asegurou, foi asumida integramente pola Administración galega con fondos propios.
«Se este campamento e tantas outras actividades son posibles, é grazas ao esforzo económico unicamente dos concellos e do Goberno galego», afirmou. Prado estivo acompañada polo alcalde de Coristanco, Juan Carlos García Pose, o vicesecretario de Organización do PP na provincia da Coruña, Gonzalo Trenor, e o deputado autonómico Rubén Lorenzo.
A dirixente popular criticou tamén a actitude do Goberno central, ao que acusou de «estar máis pendente dos seus propios problemas que das necesidades reais das familias». Nese sentido, ironizou afirmando que Pedro Sánchez «só concilia con Ábalos, Santos Cerdán ou co Fiscal Xeral do Estado», ao tempo que reiterou a súa esixencia de cesamento de García Ortiz.
Prado aproveitou a visita para destacar o compromiso dos gobernos locais do PP co benestar da cidadanía, e sinalou que Coristanco é o concello da comarca de Bergantiños que máis inviste por habitante. «Un nivel de investimento que, malia tratarse dun concello rural, o sitúa á altura de grandes cidades», apuntou.
Pola súa banda, o alcalde García Pose reivindicou o traballo feito nos últimos anos e incidiu na vontade de seguir mellorando a calidade de vida da veciñanza. Unha mensaxe que resume, en palabras e feitos, a liña política que o PPdeG quere trasladar nunha época onde a conciliación segue a ser un reto colectivo.
