A Deputación da Coruña saíu ao paso dunha denuncia feita nas redes por unha guía do dolmen de Dombate, en Cabana de Bergantiños, que asegura ter sido insultada e agarrada por parte duns turistas polo feito de empregar o galego durante unha visita guiada.
A profesional, de nome Iria, relatou que foi “avasallada” por uns turistas de Valladolid por realizar o seu labor na lingua propia de Galicia, e agradeceu o apoio recibido por parte doutras persoas presentes no lugar.
Os feitos xeraron unha ampla reacción social, con milleiros de visualizacións e moitas mensaxes de solidariedade. A institución provincial, responsable da xestión deste enclave patrimonial manifestou nun comunicado a súa “tolerancia cero” ante este tipo de condutas e reafirmou o seu compromiso coa promoción da lingua galega en todos os espazos públicos da súa titularidade.
A Deputación lembra que o uso do galego está amparado pola Lei de normalización lingüística e polo recente Plan Xeral de Normalización da Lingua Galega, que reforza a súa presenza en ámbitos como o turismo e a interpretación do patrimonio. “A nosa lingua é parte esencial da nosa identidade e unha ferramenta fundamental para garantir unha experiencia cultural auténtica”, subliñan desde a institución.
