O BNG de Vimianzo vén de propoñer que se limite o tempo máximo de estacionamento de vehículos de persoas non residentes nas rúas Castelao e Antonio Vázquez Mouzo, recentemente peonalizadas. Así mesmo, tamén solicita que se reserve unha praza de aparcamento para persoas con mobilidade reducida e outra para carga e descarga.
Os nacionalistas indican que “durante a noite e as xornadas festivas existen moitas prazas libres, mais nas xornadas laborais, e principalmente no horario de mañá, é moi difícil atopar lugares de aparcamento, ademais de observar moi pouca rotación de vehículos estacionados”.
“Unha situación que está a repercutir negativamente nos establecementos da zona, polo que propomos un tempo máximo de estacionamento de unha hora e media para os non residentes”, sinalaron desde o BNG vimiancés.
Por outra banda, a formación tamén manifestou a súa preocupación pola inseguridade para os peóns en varios puntos do concello, concretamente no traxecto entre Torelo e Santa Irene, ao longo da AC-552, e na saída de Baíñas en dirección a Olveira. Por iso, o grupo municipal presentará unha moción no vindeiro pleno para buscar o consenso da Corporación e instar ás administracións competentes á construción de beirarrúas.
Foto- Benxamín Queiro e Lorena Suárez- concelleiros
