A oposición do Concello de Corcubión aprobou por maioría no pleno celebrado este venres unha moción presentada polo grupo municipal socialista que solicita a retirada do proxecto de recuperación do espazo público e mellora da seguridade viaria impulsado polo goberno local do BNG. A moción contou co apoio dos grupos do PP e Sempre Corcubión.
Segundo explicou o PSOE, o plan presentado polo executivo municipal non responde aos obxectivos dunha verdadeira humanización, non elimina o tráfico do centro, non soluciona os problemas de aparcadoiro para os residentes das rúas afectadas e, ademais, carece de soporte legal, ao non estar recollido nunha ordenanza que o regule.
Reacción do goberno do BNG de Corcubión
Pola súa banda, desde o equipo de goberno do BNG lamentaron que os grupos da oposición se unisen para frear unha proposta que consideran necesaria para avanzar cara a un modelo urbano máis centrado nas persoas. O alcalde, Xabier Domínguez, defendeu que se trata dun proxecto incluído no programa electoral co que o BNG se presentou ás eleccións municipais de 2023, e que a súa intención é dar resposta ás demandas veciñais de mellora da mobilidade e reorganización do espazo público na zona da praza Castelao.
Domínguez indicou que a proposta contempla prazas para residentes e que se aplicará de forma temporal mediante resolución da alcaldía, ao contar con asesoramento técnico e xurídico que garante o seu encaixe normativo. “Percibimos un apoio maioritario da veciñanza, aínda que sabemos que toda mudanza xera inicialmente reticencias”, sinalou.
O BNG tamén criticou o que considera unha falta de alternativas por parte dos grupos da oposición, e lembrou que o PSOE gobernou durante vinte anos sen promover ningunha iniciativa similar. “Uníronse agora ao PP para rexeitar unha proposta que busca priorizar ás persoas fronte aos vehículos”, afirmaron desde o executivo.
A moción foi aprobada, mais o goberno local mantén a súa intención de seguir adiante co plan de xeito progresivo e revisable, aplicando as medidas previstas dentro das competencias municipais.
