A promoción turística da Costa da Morte foi o tema central da entrevista con Pepe Formoso, presidente da Asociación de Profesionais do Turismo da Costa da Morte (APTCM), no programa “Na Encrucillada” de Radio Xallas. Durante a conversa, destacou o potencial do territorio, a evolución dos visitantes e a necesidade de aumentar os recursos para reforzar a promoción do Xeodestino Costa da Morte.
Optimismo pola tempada e o clima favorable
Pepe Formoso amosouse esperanzado ante o comportamento da tempada de verán: “As expectativas que están depositadas logo de ver o mes de xuño fainos pensar que pode ser un bo verán”. Engadiu que a temperatura está respectándonos e permitindo que fagamos vida, algo que non ocorre noutros lugares da xeografía española.»
Perfil dos visitantes e atractivo do Camiño de Santiago
Sobre o perfil do turista, indicou que “cada vez veñen máis” e que “o Camiño de Santiago e o Camiño dos Faros” son claves para atraer a visitantes internacionais. “A xente que continúa cara a Fisterra e Muxía é en maior medida estranxeira”, explicou.
Tamén apuntou que Galicia está funcionando como “refuxio climático”, especialmente para xente do sur de España.
Hospitalidade local, natureza e desestacionalización
O presidente da APTCM destacou a importancia da hospitalidade local: “Temos un servizo cara a cara, persoal, que ao final enriquece a experiencia”.Subliñou que o visitante busca natureza, gastronomía e patrimonio, tres elementos que están presentes todo o ano: “Temos natureza, gastronomía e patrimonio durante os doce meses do ano”.
A necesidade de superar a estacionalidade tamén ocupou parte da conversa. “Temos que poñer en valor o noso produto na tempada que corresponde”, afirmou, poñendo como exemplo os mariscos nos meses con ‘R’: “Se este marisco pareceu bo, nos meses con ‘R’ estaría excepcional”.
Profesionalización, colaboración institucional e retos económicos
Formoso explicou que o traballo da asociación pasa pola profesionalización e pola unión do sector: “Temos que ter un sector totalmente unido” e “desde a directiva tivemos claro a necesidade de contar cun equipo técnico que nos xestione e nos ordene”.
Tamén falou da colaboración institucional: “Estamos moi agradecidos pola boa relación coa Deputación da Coruña, Turismo de Galicia, Consellería do Mar e Consellería do Medio Rural”.
Con todo, recoñeceu que os recursos económicos seguen a ser escasos: “O presuposto de aportación dos 17 concellos e dos empresarios son 45.000 euros en total”, e dixo que sería necesario actualizar os baremos, xa que “probablemente multiplicamos por tres o número de camas desde 2016”.
Ao final da entrevista, insistiu en que o destino está preparado para ofrecer experiencias todo o ano: “Os outonos, primaveras e invernos da Costa da Morte son marabillosos”, e que sería clave conseguir que os visitantes regresen fóra do verán: “Cada cliente que chega marcha con gañas de voltar”.
Como metáfora final, puxo un exemplo gráfico: “Sabes a diferenza entre un rodaballo e unha galiña? : o rodaballo pon nove millóns de ovos e non se entera ninguén. Unha galiña pon un ovo e entérase todo o mundo. Desafortunadamente, somos máis rodaballo que galiña”.
Divulgar a Costa da Morte, dar a coñecer toda a súa riqueza e un dos grandes retos de APTCM.
