O Grupo Municipal Socialista de Muxía informa que está a recibir numerosas queixas de familias usuarias do campamento de conciliación organizado polo Concello este verán.
Segundo sinalan, os pais e nais denuncian irregularidades na xestión do proceso de admisión e mostran malestar co desenvolvemento do programa Concilia.
O portavoz socialista, Iago Toba, asegura que estas protestas repiten situacións similares xa detectadas, segundo el, en anteriores convocatorias do programa durante Nadal, Entroido e Semana Santa.
Presentación dun escrito
O grupo socialista anuncia que presentará un escrito no Rexistro Municipal solicitando información detallada sobre os criterios de selección e propoñendo a ampliación das prazas para atender todas as solicitudes.
Desde o PSOE tamén se critica o papel da actual responsable da área, Aurelia Picallo (Independientes por Muxía), da que din que non está dando resposta ás familias afectadas. Ademais, cuestionan o apoio do BNG ao actual executivo, acusándoo de non posicionarse ante as queixas recibidas e de actuar como “cómplice” da situación.
Os socialistas indican que, durante o seu mandato anterior, todas as solicitudes de praza foron atendidas segundo as preferencias familiares, e aseguran que seguirán canalizando as reclamacións que as familias decidan presentar.
