O secretario xeral do PSdeG, José Ramón Gómez Besteiro, anunciou este mércores en Vimianzo que o seu partido “redobrará a ofensiva” nas institucións para reclamar a continuidade da autovía da Costa da Morte ata Cee. Así o manifestou durante unha visita ao punto no que remata actualmente a infraestrutura, acompañado por representantes socialistas de varios concellos da comarca.
Besteiro criticou que tanto no Parlamento galego como na Deputación da Coruña o PP votase en contra das iniciativas presentadas polo PSdeG para avanzar na ampliación da vía. “Votaron en contra de todas as nosas propostas”, afirmou, ao tempo que cualificou de “decepcionantes e preocupantes” as respostas ofrecidas polo Partido Popular na última semana.
Segundo indicou, a autovía proxectada durante o goberno bipartito tiña unha lonxitude de 45 quilómetros, mentres que o actual trazado se reduciu a 25 quilómetros, o que representa unha diminución do 35 %. A pesar deste recorte, afirmou que o orzamento incrementouse nun 68 % respecto ao proxecto inicial. “Fixeron menos e custou máis”, indicou.
Infraestrutura completa e sen peaxes
Durante a visita, na que estivo acompañado polas alcaldesas de Vimianzo, Cee e Camariñas, así como polos alcaldes de Dumbría e Carnota e outros representantes locais e do PSdeG, reclamouse unha infraestrutura “completa e sen peaxes” que se estenda ata Cee e sexa gratuíta tamén no tramo entre Carballo e A Coruña.
Besteiro considerou que os anuncios realizados pola Xunta sobre o tramo pendente constitúen “un parche”, xa que se trata dun treito de 5,5 quilómetros, sen dobre calzada, sen calendario definido e que non alcanza Berdoias.
O líder socialista tamén reivindicou a supresión das peaxes na AG-55, en liña coas demandas que, segundo sinalou, o PP realiza en Madrid noutras infraestruturas. Neste sentido, apuntou que o Goberno central aplica bonificacións de ata o 75 % nas peaxes da AP-9 e AP-53 para usuarios recorrentes, mentres que a Xunta, afirmou, “regalou 300 millóns de euros ás concesionarias de autovías que xa eran gratuítas”.
Valoracións sobre o novo secretario xeral do PP
A preguntas dos medios, Besteiro referiuse tamén aos cambios anunciados na dirección do Partido Popular, e cualificou a designación de Miguel Tellado como novo secretario xeral como “propia dun hooligan”. Considerou que esa decisión “non será boa para España” e resultará “contraditoria co que o Partido Popular di defender aquí en Galicia”.
