Na Carballeira de Berdeogas, coñecida como a “Devesa da Lúa”, celebrarase o vindeiro 20 de xullo un evento que para o alcalde de Dumbría, Raúl González Lado é “a cita máis importante do ano”, a XXIII Festa da Familia.
E certamente estamos diante dun evento moi entrañable, divertido e multitudinario, nunha contorna idílica.
Haberá un Xantar na Carballeira (pódese reservar a mesa no concello de Dumbría ata o 16 de xullo), e estará presente a Pulpería Alejandra Salinas para vender racións de polbo, churrasco, criollos,etc..
A Orquesta Galilea ofrecerá a sesión vermú, e o grupo de gaitas da asociación cultural Longarela e a charanga O Rumbo animarán unha velada na que non faltarán os xogos tradicionais.
E a partir das 18,00, A orquesta Galilea volverá a actuar acompañada por Cuarta Calle. Dúas formacións que seguramente ofrecerán unha boa tarde verbeneira.
A Orquesta Cuarta Calle conta co coñecido artista Jorge Ferre. Tamén coñecido neste mundiño é Richard Blanco de Galilea, que pasou por diferentes orquestas de Galicia.
Boas referencias musicais para “unha festa moi querida especial polo que representa, onde as presentacións sobran, xa que o espírito desta gran romaría familiar, levámolo no noso corazón coma a nosa identidade”, como sinala o alcalde dumbriés nunha carta ós veciños.
