Fisterra acollerá esta fin de semana a segunda edición do Fisterra Experience, unha proposta cultural que mestura música, paisaxe e identidade local co apoio do programa Concertos do Xacobeo da Xunta de Galicia. A cita desenvolverase os días 27, 28 e 29 de xuño e reunirá unha selección de artistas galegos e novos talentos nun marco sostible e singular.
O director de Turismo de Galicia, Xosé Merelles, presentou este mércores o evento e destacou que “se dá cobertura a unha cita que aposta pola proximidade, a nosa paisaxe e a posta en valor do novo talento musical galego, aberto a xéneros e sons atractivos e diversos”.
O Fisterra Experience 2025 pretende ir máis alá dun festival convencional. A súa filosofía céntrase na creación de experiencias próximas, que conecten coa natureza e co público desde unha ollada comunitaria. A música convértese así en fío condutor dunha proposta cultural que busca destacar o potencial artístico da vila e do seu territorio.
No cartel deste ano figuran artistas como Baiuca, Mondra, Helena Egea, Sabela & The Heartbreakers, A Pedreira ou Andhrea & The Black Cats, entre outros nomes relevantes da escena galega actual. A programación abrangue estilos como a música electrónica, o soul, o pop, o jazz ou as novas correntes da música tradicional.
A cita insírese no marco dos Concertos do Xacobeo, o programa promovido pola Xunta que engloba máis de 120 festivais e ciclos por toda Galicia. Só na provincia da Coruña están previstos máis de 50 eventos musicais, consolidando a comunidade como destino de referencia para festivais e propostas artísticas durante o verán.
O Fisterra Experience, como apuntou Merelles, contribúe á dinamización do turismo e da economía local, ao tempo que promove un modelo de evento sostible e con identidade, no que participan tamén asociacións, hostalería e comercio da zona. O programa completo de actividades pode consultarse en www.concertosdoxacobeo.gal.
