O secretario xeral do PSdeG, José Ramón Gómez Besteiro, solicitou á Xunta que atenda as demandas das áreas empresariais, especialmente no que respecta ao solo industrial e ás conexións viarias e de transporte. Tras unha visita ao polígono de Bértoa, en Carballo, recolleu as principais preocupacións do tecido empresarial, que reclama máis espazo para medrar e mellores infraestruturas.
Besteiro sinalou como prioridade a ampliación da superficie industrial, que pasaría de 1,3 a 1,8 millóns de metros cadrados, ante a falta de parcelas dispoñibles. Advertiu de que esta situación dificulta a expansión das empresas existentes, a chegada de novos proxectos e a creación de emprego.
Demandas de Besteiro
O responsable socialista reclamou tamén a construción da circunvalación de Carballo e a incorporación do polígono á Rede de Transporte Público de Galicia, lembrando que o 60 % das persoas traballadoras acceden actualmente en vehículo privado. Tamén criticou a falta de bonificacións nas peaxes da AG-55, comparando a situación coa AP-9 e a AP-53.
Besteiro defendeu que unha industria forte e innovadora é clave para o crecemento económico e o emprego, e reiterou que o obxectivo do PSdeG é que o sector industrial acade o 20 % do PIB galego. “Necesitamos unha Xunta comprometida co desenvolvemento de zonas industriais coma esta”, concluíu.
