O equipo de goberno de Corcubión, liderado polo BNG, vén de impulsar unha iniciativa para garantir o mantemento e a mellora do servizo de Correos na vila. A proposta canalizouse a través do deputado nacionalista Néstor Rego, quen rexistrou unha serie de preguntas no Congreso dirixidas ao Goberno central, solicitando información sobre os plans para o edificio que alberga as oficinas postais.
Segundo indica o executivo local, o inmoble —situado na praza principal da vila— foi construído sobre un terreo cedido gratuitamente polo Concello no ano 1966 á entón Caixa Postal, co obxectivo de prestar servizos postais e bancarios á veciñanza. Porén, denuncian que o mantemento da oficina podería verse ameazado, tras comunicarlle representantes de Correos ao Concello a súa intención de vender o edificio e avanzar cara ao desmantelamento do servizo.
Desde o goberno local lembran que, segundo as condicións da cesión, se a actividade deixa de prestarse, o edificio debería reverter á administración municipal. O Concello anuncia que defenderá este dereito ante Correos e ante as distintas administracións competentes.
Piden máis horario de atención ó público
Ademais, o executivo critica a redución progresiva do horario de atención ao público, limitado actualmente ás mañás de luns a venres, de 10:00 a 14:00 horas, o que consideran insuficiente para a cidadanía. Por iso, solicitan a ampliación do horario, incluíndo atención polas tardes e os sábados pola mañá.
O goberno municipal tamén cuestiona a política do PSOE respecto aos servizos públicos nas zonas rurais, acusando ao executivo estatal de promover recortes mentres afirma defender a chamada “España baleira”.
