Manel Muñoz contou en Radio Xallas que a historia da Disco Móvil CDC comezou como un hobby nun baixo en Cee, facendo festas con amigos. A popularidade medrou co boca a boca, e en poucos anos pasou de pequenas festas privadas a eventos multitudinarios. En 2013 deron o salto cun escenario propio, inspirado nos camións das grandes orquestras.
“Comezamos cun baixo, cunhas churrascadas e acabamos montando escenarios en festas con 30.000 persoas como en A Fervenza.”
Crecemento sostido e traballo en equipo
Disco Móvil CDC medrou ata converterse nunha referencia nas verbenas galegas. Hoxe poden mobilizar entre 15 e 18 persoas por día, incluíndo DJs, montadores e animadores. Nun día de máxima actividade, poden cubrir entre cinco e oito eventos en paralelo, segundo a demanda.“Hai fins de semana de verán nos que temos cinco ou seis eventos diarios.”
Son e animación como sinais de identidade
Un dos factores clave do éxito foi a aposta pola calidade do son e a animación. Manel destacou que o equipo inviste moito na mellora continua e que a animación e a lectura do público son tan importantes como a música.“Non se trata de poñer música a voleo, hai que ler a festa e saber animar.”
Flexibilidade e formatos para todo tipo de eventos
CDC conta con distintos formatos, dende estelares móbiles ata cabinas pequenas para vodas ou festas locais. O público xa recoñece e diferencia os formatos CDC e Mega CDC.“Temos opcións adaptadas para cada festa: grandes, medianas ou máis íntimas.”
A verbena galega, viva e con futuro
Manel reivindicou o valor cultural da verbena galega, e asegurou que seguirá viva pese ás dificultades. Tamén subliñou a importancia de coidar as comisións de festas e manterse activos comercialmente. “A verbena é parte da nosa cultura, segue chamando a atención dentro e fóra de Galicia.”
Aínda que xa non pincha tanto como ao principio, recoñece que lle gusta volver ás orixes de vez en cando. Con todo, a xestión diaria ocupa hoxe a maior parte do seu tempo. “Se tivera máis tempo, volvería á cabina, porque isto empezou por paixón e iso non cambia.”
