En Santa Comba, as traballadoras do Servizo de Axuda no Fogar denuncian a falta de resposta do alcalde xalleiro ás súas peticións para manter reunións nas que tratar cuestións laborais pendentes, segundo unha nota de prensa remitida a este xornal.
Entre os temas que reclaman abordar están a Relación de Postos de Traballo e aspectos como a xornada, os descansos, o recoñecemento da antigüidade ou a compensación polo traballo en fins de semana e festivos.
Segundo o persoal, algunhas traballadoras non están a percibir os trienios correspondentes malia telos solicitado, e aseguran que están a empregar os seus teléfonos persoais para tarefas laborais sen acordo previo, incluída a xeolocalización.
A representación legal das traballadoras presentou varias denuncias ante a Inspección de Traballo para que se investiguen estes feitos.
A CIG, sindicato que apoia as reclamacións, critica que non se produza ningunha reunión coa alcaldía, tal e como veñen solicitando, para tratar estas cuestións, e lembra que o SAF é un servizo esencial na atención domiciliaria.
