A Asociación Cultural Santa María de Torás volverá a converter a capital municipal da Laracha nun escenario de música e baile tradicional galego. Farao por partida dobre: co III Día da Muiñeira, este domingo 25 de maio, e coa Foliada polo XLVI aniversario da entidade, o vindeiro 7 de xuño.
Os eventos foron presentados esta mañá no Concello coa participación da presidenta da asociación, Almudena Martínez, acompañada polo alcalde, José Manuel López Varela, e a concelleira de Cultura, Patricia Bello, que destacaron a colaboración municipal nas dúas citas.
Este domingo, 25 de maio, máis de 200 persoas pertencentes a 10 asociacións da Costa da Morte, A Coruña e a súa contorna participarán no III Día da Muiñeira. A partir das 16:30 h, terá lugar a concentración na Praza do Concello e, a seguir, un pasarrúas ata a Praza Les Sables d’Olonne, onde comezará a celebración ás 17:30 h. O pregón correrá a cargo da recoñecida artista Fransy González.
O 7 de xuño, Santa María de Torás conmemorará o seu 46 aniversario cunha xornada festiva tamén na Praza do Concello. A festa arrancará ás 13:30 h coa sesión vermú, seguida dun xantar con churrasco ás 14:30 h (os tíckets xa están á venda). A partir das 18:00 h terá lugar a foliada, e desde as 21:30 h as actuacións de Fransy González e Davide Salvado, acompañadas de petiscos a prezos populares. Ademais, realizaranse sorteos de agasallos doados por comercios colaboradores.
O alcalde da Laracha felicitou á asociación pola súa traxectoria e pola organización de dous eventos que prometen encher de cultura, tradición e festa as rúas da vila.
