O Concello de Santa Comba vén de adxudicar obras por un importe superior aos 600.000 euros, correspondentes ao Plan de Obras e Servizos (POS) da Deputación da Coruña. Os traballos desenvolveranse ao longo dos meses de verán en diversos núcleos do municipio.
As actuacións terán lugar en Armán, Cubelo de Arriba e Cubelo de Abaixo (San Xoán de Grixoa), Guldris (Santa Sabiña), A Xesteira (Arantón), Ser e na estrada que conecta Freixeiro coa Illa, Castropombo e Portocarreiro, na parroquia de Freixeiro.
O alcalde Alberto Romar sinala que se continuará apostando polo uso de aglomerado asfáltico, coa intención de mellorar a durabilidade e a regularidade das estradas, asegurando infraestruturas de calidade para a veciñanza dos núcleos xalleiros.
Declaracións de Alberto Romar:
“Aglomerar é un gran esforzo económico pero a medio prazo economizaremos, xa que durante moitos anos confiouse nos regos asfálticos e houbo que facer as mesmas obras constantemente.”
“Os núcleos onde pisa a xente debemos aglomerar sempre; e nas estradas que unen núcleos, ás veces será necesario recorrer ao rego para mantelas en estado decente.”
O rexedor tamén expresou o seu agradecemento á Deputación da Coruña, presidida por Valentín González Formoso, polos fondos que fan posible estas actuacións de mellora viaria.
