O Partido Popular apoiou a iniciativa do BNG pero presentará unha iniciativa parlamentaria máis completa despois de que non se aceptara a emenda dos populares.
A deputada Paula Mouzo Mas lamentou que o BNG vetara a emenda do PPdeG para que esta iniciativa parlamentaria incorporara outras medidas, como solicitar a modernización e reforzo dos medios materiais e tecnolóxicos do Servizo de Vixilancia Aduaneira, ampliar a dotación de medios persoais e materiais empregados polo Goberno de España na loita contra o narcotráfico ou garantir a plena operatividade horaria do persoal do SVA para non comprometer a execución de operacións contra o narcotráfico.
Para Mouzo a proposta do BNG “non é todo o ambiciosa que debería para atender as demandas dos traballadores deste servizo para atallar un verdadeiro problema social”.
A parlamentaria precisou que “É necesario demandar ao Goberno de España máis compromiso con Galicia “porque consideramos necesario e urxente que haxa unha revisión integral de todos os medios persoais e materiais que temos para loitar contra o narcotráfico no litoral da provincia de A Coruña e en toda a costa galega”.
Modernización dos efectivos
Tamén manifestou que “se todos coincidimos que temos medios obsoletos, teremos que pedir a modernización e o reforzo dos medios materiais e tecnolóxicos do Servizo de Vixilancia Aduaneira en Galicia, porque a situación actual pide unha proposta máis ampla e completa para atallar un verdadeiro problema social, e pide facelo dun xeito construtivo”.
Paula Mouzo criticou que o Goberno de Pedro Sánchez “estea dotando de medios para a loita contra o narcotráfico a outras comunidades pero non a Galicia”, e puxo como exemplo a Andalucía. “A nós parécenos un acerto que Vixilancia Aduaneira sume medios máis modernos alí onde se necesitan, como é o caso de Alxeciras, pero ao mesmo tempo están enviando a Galicia medios máis antigos e obsoletos que non queren noutras bases ou directamente non nos envían nada”, apuntou.
“O único que lle pedimos ao Goberno de Pedro Sánchez é que a distribución de medios non veña condicionada pola necesidade da vicepresidenta Montero de apuntalar as súas malas perspectivas electorais en Andalucía”, rematou.
