Un equipo do IES Terra de Xallas quedou primeiro na fase previa do Club de Debate Alingua, que se celebrou en Ribeira asegurando o seu pase para a final que se celebrará en Vilagarcía de Arousa o vindeiro 26 de abril.
O equipo xalleiro está formado por Berta Lema, Alexia Rey, Alba Vidal, Anxo Romero, Judit Antelo, Lucia Nieto, Daniela Suárez, Darío Cornes, Noa Capelo e Paula Calvo.
Tamén cómpre destacar o excelente papel doutro equipo do mesmo centro que rematou na terceira posición. Estivo formado por Victor Negreira, Pablo Rial, Alba Porteiro, Lorena Porteiro, Daniela Pose, Sofia Sande, Noa Porteiro, Nerea Lopez e Sara Pensado.
Nesta fase participaron case 300 mozas e mozos. Alumnas do IES Terra de Xallas gañaron a edición do ano pasado.
O Club de Debate é un programa cooperativo que promove e valora o uso oral do galego, o espírito crítico, a tolerancia e o traballo en equipo na mocidade. A iniciativa está promovida pola Asociación de Entidades pola Lingua Galega (Alingua), e na súa edición 2025 está apoiada polos concellos de Carballo, Dodro, Ferrol, Narón, Pontedeume, Pontevedra, Ribeira, Rois, Santa Comba, Santiago de Compostela, Teo e Vilagarcía de Arousa.
