Os concellos de Vimianzo e Dumbría presentarán conxuntamente a campaña ‘MiraQvistas’ no stand de Turespaña durante a Feira Internacional de Turismo (Fitur), que se celebra esta semana en Madrid. A presentación terá lugar o xoves 23 de xaneiro, ás 17:50 horas, nun evento que destacará dous dos miradoiros máis representativos da Costa da Morte: o recentemente inaugurado miradoiro de Cereixo e o emblemático miradoiro do Ézaro.
A iniciativa busca poñer en valor a singularidade destas localizacións, situadas nas desembocaduras de ríos e que ofrecen panorámicas privilexiadas ao mar. O miradoiro de Cereixo, situado en Vimianzo, destaca como unha nova estrutura que xa apunta a converterse en referente turístico, mentres que o miradoiro do Ézaro, en Dumbría, é amplamente recoñecido pola súa famosa cascada que desemboca directamente no océano.
A alcaldesa de Vimianzo, Mónica Rodríguez, subliñou a importancia de aproveitar esta oportunidade para promover o miradoiro de Cereixo: “É unha estrutura desde a que podemos gozar dunhas vistas excepcionais. Este é un paso máis para consolidalo como miradoiro Starlight, dado o seu potencial para a observación astronómica”.
Pola súa parte, o alcalde de Dumbría, Raúl González, destacou a colaboración entre os dous municipios como clave para fortalecer o atractivo turístico da Costa da Morte. “A unión é fundamental para posicionar esta zona como un destino único, natural e cheo de experiencias. Estamos convencidos de que as nosas vistas non deixarán indiferentes a ninguén”, sinalou.
A presentación en Fitur incluirá detalles sobre a campaña ‘MiraQvistas’ e sobre as marabillas naturais destes espazos, buscando consolidar a Costa da Morte como un destino turístico de referencia tanto a nivel nacional como internacional.
