O BNG de Vimianzo denuncia que o boletín municipal supón un despilfarro por parte dun goberno local que fai un “uso partidista” desta publicación.
“Este folleto propagandístico, ademais de supoñer un gasto innecesario e que ningún veciño ou veciña ten demandado, non ten outro obxectivo que facer propaganda ao goberno municipal” manifesta o portavoz municipal, Benxamín Queiro.
Desde o BNG considera que hai partes da publicación que poden vulnerar a lei 29/2005 de publicidade e propaganda institucional, que prohibe expresamente financiar con cartos públicos calquera publicación con contidos deliberadamente orientados a exaltar ao grupo de goberno.
Queiro opina que “os fondos públicos usados para o boletín municipal poderían ser invertidos noutras cuestións máis necesarias para a veciñanza”.
Explicou que “desde o BNG condenamos enerxicamente este acto de despilfarro do diñeiro de todos e todas, ao tempo que tachamos de intolerable esta actuación por parte da rexedora municipal”.
Así mesmo, o portavoz de grupo nacionalista lembrou que os grupos políticos municipais reciben mensualmente unha cantidade que poden empregar para o fin que estimen oportuno. “Instamos á alcaldesa a que, se desexa facerse publicidade e autobombo, o faga cos cartos do seu partido e non cos de todos os veciños e veciñas”.
