O Concello de Mazaricos organiza un ano máis un completo programa de Nadal co que convida a toda a veciñanza a vivir estas festas en comunidade e presumindo do noso. Espectáculos, exposicións e actividades infantís xúntanse no programa cos clásicos destas datas, como a Carreira do Leite, o Brinde Leiteiro e a gran Tractorada de Reis.
A Casa de Cultura acolle este ano, e durante toda a tempada de festas, unha fantástica exposición de beléns artesáns, obra do veciño de Olveira Gumersindo Capelo. Centos de pezas feitas a man ao longo dos anos, utilizando todo tipo de materiais, que dan mostra dunha gran creatividade e capacidade técnica. As pezas, que poden visitarse de luns a venres pola mañá, non deixarán a ninguén indiferente.
Un ano máis, o Concello ofrece un completo programa de conciliación para as familias, dentro da iniciativa Conciliamos no Nadal. As nenas e nenos de infantil e primaria desfrutarán de actividades moi especiais os días 23, 24, 26, 27, 30 e 31 de decembro, así como os 2, 3 e 7 de xaneiro, de 9h da mañá a 14:30h.
O próximo sábado, 21 de decembro, a Escola de Música Moderna de Mazaricos celebra o tradicional festival de Nadal. Será ás 12h da mañá na Casa de Cultura con entrada libre, ofrecendo un recital para toda a veciñanza.
O xoves 26, a partir das 5 da tarde, o recinto feiral da Picota acollerá unha festa infantil chea de diversión. A rapazada poderá xogar nun fantástico parque de inchables e haberá unha chea de sorpresas.
O domingo 29 de decembro, a Casa de Cultura acolle dende as 5 da tarde o espectáculo CRUNCH 2. Volven con novas aventuras os superheroes Spunk e Scrunch con circo, clown, malabares, saltos mortais, golpes e caídas a eito. A entrada é libre.
O día 31 chega un dos eventos máis especiais do ano coa celebración, a partir das 16:30h da tarde, da VII Carreira do Leite de Mazaricos. Este ano contará con catro categorías: xatiños (nenas e nenos nados de 2016 a 2020), becerros (entre 2012 e 2015), xovencas (de 2008 a 2011) e vacas (persoas nacidas ata o ano 2007). A inscrición pode levarse a cabo no formulario habilitado a tal efecto antes da medianoite do luns 30 de decembro.
Ao remate, dende as 18h, terá lugar a entrega de premios e celebrarase a oitava edición do Brinde Leiteiro. Neste evento, ao que se convida un ano máis a toda a veciñanza, brindarase con este produto tan importante para Mazaricos, o primeiro produtor de Galicia.
As festas chegan á súa fin o 5 de xaneiro coa tradicional Gran Tractorada de Reis. As súas maxestades os Reis Magos de Oriente volven percorrer as rúas de Mazaricos e rematan o seu itinerario no recinto feiral da Picota, nunha gran festa con agasallos para toda a rapazada e onde se poderá desfrutar dunha deliciosa chocolatada para todas as persoas asistentes.
Nota de prensa do concello de Mazaricos
