Un fantástico miradoiro sobre a ría de Camariñas, chamado a Furna do Sapo e sitúado na parroquia vimiancesa de Cereixo foi inaugurado este venres, nun acto que contou coa presenza do Conselleiro do Mar, Alfonso Villares, e do director de Turismo de Galicia, Xosé Merelles, que acompañaron á alcaldesa de Vimianzo, Mónica Rodríguez.
Tamén asistiu o presidente do GALP Costa da Morte, Evaristo Lareo, a deputada autonómica, Paula Mouzo Mas e alcaldes de concellos como Dumbría, Muxía, Zas, ou Camariñas, xunto con membros da corporación local vimiancesa e veciños.
Na súa intervención, a alcaldesa de Vimianzo, Mónica Rodríguez, destacou que “hoxe inauguramos non só unha obra, senón unha nova experiencia para gozar da nosa contorna. Este miradoiro é un símbolo do noso compromiso coa promoción do noso territorio e coa posta en valor do noso patrimonio natural. Queremos que quen visite este lugar sinta que está a voar sobre a ría, admirando a súa beleza única”.
Pola súa banda, Alfonso Villares, destacou que a colaboración da Consellería do Mar, permitiu a construción desta dotación que contribúe a poñer en valor o patrimonio medioambiental da ría de Camariñas, atendendo a criterios de sustentabilidade e de valorización da cultura inmaterial pesqueira galega.
Xosé Manuel Merelles indicou que “O turismo estase a converter nun auténtico dinamizador económico do rural”, e subliñou o incremento no número de visitantes á Costa da Morte de xaneiro a outubro deste ano, un 6,3% máis, pero sobre todo, o turismo internacional que creceu o 19,5%.
Ademais do miradoiro, a actuación incluíu a construción dunha explanada de acceso con muro de contención de granito, pavimentación con xabre e unha zona de aparcadoiro, facilitando o acceso a este novo espazo recreativo e didáctico.
O proxecto, cun orzamento total de 85.278,10 euros, foi financiado grazas a unha axuda da Consellería do Mar a través do GALP Costa da Morte.
