A corporación local de Camariñas aprobou por unanimidade a adhesión á estratexia de promoción da saúde e prevención no Sistema Nacional de Saúde (SNS) e IV Plan de Igualdade de Oportunidades (PIOM) entre mulleres e homes 2024-2028.
Tamén se aprobou un expediente de modificación de créditos de 25.000 euros coa abstención de BNG e PP. E por unanimidade outro expediente que financiado coa participación de tributos de 2022 que posibilitará acometer investimentos por importe de 78.000 euros en Santa Mariña, Camariñas y Camelle.
Mocións aprobadas de PSOE e BNG
O pleno deu luz verde a unha moción do PSOE na que se demandaba á Xunta o saneamento en Xaviña e melloras na zona portuaria de Camariñas. Contou co apoio do BNG e a abstención do PP que recriminou a práctica repetida do grupo socialista de presentar mocións un día antes do pleno.
Aprobouse unha moción presentada polo BNG de apoio á lingua galega e de adhesión á Plataforma Queremos Galego, cos votos a favor de BNG PSOE e en contra do PP.
O concelleiro nacionalista Xurxo Rodríguez solicitou a gravación dos plenos e a creación dun regulamento de organización municipal. E interesouse polo arranxo da estrada de Camelle a Ponte do Porto ou pola presenza de gatos no municipio.
Rexeitan unha moción do PP sobre a Garda Civil
As dúas moción presentadas polo PP foron rexeitadas por PSOE e BNG. Os populares pedían o reforzo dos efectivos da Garda Civil como xa anunciaran durante a visita das deputadas Ana Vázquez e Marta González a Camariñas.
Tamén demandaban a eliminacións das últimas medidas impositivas do goberno de Pedro Sánchez en relación coa xestión do lixo. “Lamentamos que PSOE e BNG uniran os seus votos e rexeitaran unhas mocións que podería servir para mellorar a seguridade cidadá e aliviar a carga impositiva ós veciños de Camariñas” manifestaban os populares nunha nota de prensa.
Paula Mouzo Mas presentou varios rogos e preguntas. Pediu o arranxo da estrada que comunica Camelle e Arou e das vías interiores de Brañas Verdes. Tamén se interesou polas licitacións previstas e pola ampliación do cemiterio municipal. O concelleiro Juan Carlos Amado Sambade interesouse polas obras que se están executando na zona da Gándara, en Ponte do Porto.
