O alcalde de Santa Comba, Alberto Romar, defendeu o Plan de Axuste, xa que a pesar de ser de adhesión obrigatoria, contribuirá a “facer un concello fiscalmente viable”.
O obxectivo é reducir o período medio de pago a provedores que en Santa Comba está nos 234 días. Seguindo os plans do Ministerio de Hacienda. O alcalde referiuse a existencia de 2.5 millóns de euros de facturas pendentes de pago.“Se non nos obrigara o Ministerio a meternos metíame eu” zanxou Romar.
O concello adoptará diferentes medidas que suporán a regularización e a suba de taxas e servizos como o IBI urbano, recollida de lixo, as actividades deportivas, servizo de ximnasio, a redución da partida de gastos de persoal ou a eliminación de indemnizacións a funcionarios dentro do horario de traballo por asistencia a órganos colexiados.
Romar:»Este plan marcará o porvir de santa comba»
“Imos ter máis fondos para camiños, servizos e eventos pero non máis fondos para contratar asesores nin para saír na prensa e branquear a imaxe” declarou o mandatario que está convencido de que estas medidas “marcarán o porvir” do concello de Santa Comba e que servirán tamén para mellorar os servizos e incrementar os investimentos.
O Plan de Axuste aprobouse cos votos a favor do PSOE e en contra do PP. Tamén se aprobou un préstamo co Estado por importe de máis de 900.000 euros, sen xuros e cun prazo de devolución de 15 anos, que se destinará ao pago de facturas pendentes ata o 31 de marzo de 2024. Neste punto o PP abstívose.
Pose:»ímos a cobrarlle ós nosos veciños por todo»
O PP denuncia un plan de rescate para subir impostos
A portavoz do Partido Popular, María Pose, sinalou que era “un plan de rescate” baseado “en subir os impostos e conseguir máis fondos pero non se preocuparon de facer un axuste nas súas dedicacións, seguen cobrando o mesmo”.
“Non tivo a capacidade de xestión suficiente para regularizar a situación do concello. Vostede aumentou a débeda a provedores pagando os favores electorais” declarou Pose.
Os populares afirman que unha medida obrigada desde o goberno central “non é un éxito” máis ben “o resultado dunha mala xestión”.
Alberto Romar recriminou a ausencia de “propostas” desde o PP, e con respecto aos salarios do goberno comentou que “agora estase facendo un traballo que antes non se facía”.
