A conselleira de Economía e Industria, María Jesús Lorenzana, avanzou que o Goberno galego continuará vixiando o cumprimento dos compromisos adquiridos no proceso de compra por parte dos actuais propietarios hai un ano.
Nomeadamente, a execución do plan industrial de XEAL no eido da ferroaleación nas plantas de Cee e Dumbría, e no de xeración eléctrica a través dos saltos de auga das centrais emprazadas nas concas do Xallas e Grande.
Lorenzana trasladou esta mensaxe nunha xuntanza co comité de empresa de XEAL para escoitar as demandas dos traballadores respecto da situación actual da factoría.
A titular de Economía e Industria tamén se comprometeu a realizar un seguimento periódico da situación para poder analizar calquera novidade que se poida producir co fin de garantir un diálogo aberto e permanente, así como de traballar da man da empresa para garantir a actividade industrial na zona.
