O Consello comarcal do BNG da Costa da Morte acordou abrir expediente disciplinario a Mercé Barrientos por vulnerar os criterios políticos para acordos no ámbito local fixados pola organización.
Os nacionalistas desautorizan a moción de censura de Muxía e polo tanto “acordouse abrir o expediente disciplinario, conforme ao estabelecido nos principios organizativos e normas de funcionamento do BNG”.
Críticas a Iago Toba
Desde o Consello comarcal da Costa da Morte afirman que “O PSOE contribuíu a chegar a esta situación, pois tendo coñecemento das actitudes intolerábeis do seu alcalde cara á concelleira do BNG, o PSOE non tomou ningunha medida para deter o comportamento machista, irresponsábel, irrespectuoso e antidemocrático do seu alcalde”.
Sinalan que Mercé Barrientos “foi obxecto de comentarios e actitudes que non só minan a súa dignidade, senón que tamén reflicten un ambiente político tóxico que non debería ter cabida na nosa sociedade”.
Recriminan ao actual alcalde Iago Toba unha actitude baseada “na descualificación e na ridiculización, poñendo en evidencia falta de madurez e responsabilidade que debe conlevar un cargo público”.
