Os concelleiros da oposición de Muxía presentaron este luns unha moción de censura contra o alcalde socialista Iago Toba.
O pasado venres a concelleira nacionalista Mercé Barrientos aseguraba en Radio Xallas que o BNG non apoiaría nin tampouco “participaría” nun goberno co PP. O candidato proposto é o independente Javier Sar.
Esta é a nota difundida polos impulsores da moción de censura en Muxía.
Hoxe, día 23 de setembro, os tres grupos que actualmente conformamos a
oposición: IxM, BNG e PP, vimos de presentar no Concello unha proposta de
moción de censura para a destitución de D. Santiago Manuel Toba Campaña
como alcalde de Muxía.
Nas pasadas eleccións celebradas o día 28 de Maio de 2023, ningún dos
partidos obtiña maioría absoluta para gobernar, sendo necesario chegar a
acordos entre as distintas forzas políticas. Así, facendo uso das ferramentas
democráticas, e co acordo dos seis concelleiros e concelleiras que conforman a
oposición, proponse ao concelleiro D. Francisco Javier Sar Romero, de
Independentes por Muxía, como alcalde do Concello de Muxía.
Os últimos 16 meses de lexislatura, nos que o actual alcalde se negou
continuamente a dialogar coa oposición, caracterizáronse pola ausencia de
orzamentos actualizados; abuso na utilización e esgotamento do remanente;
extralimitacións na contratación menor; pago de facturas e contratación sen
partidas orzamentaria asignadas; incumprimento de acordos plenarios; xestión
ineficiente dos servizos municipais; contratos vencidos sin renovar; incapacidade
para o diálogo político; ataques de carácter persoal e menosprezo ao labor da
oposición; ademáis de que o SAF permanece sen licitar.
Ó longo destes 16 meses, a oposición solicitou ó Sr. Alcalde, reiteradas veces,
un cambio de rumbo tanto na súa xestión coma nas súas formas. Cambio que,
lamentablemente, nunca se deu.
Ante esta situación de desgoberno e divisón, e ante a falta dunha maioría
absoluta, propoñemos un cambio que vai máis alá de siglas políticas e intereses
partidistas, forxado cun sentido de responsabilidade política, confianza, lealdade,
respecto e entendemento entre os distintos grupos que conforman a corporación municipal.
Un novo goberno onde o diálogo, a transparencia e a atención aos problemas e necesidades da veciñanza sexan unha realidade.
Segundo a lexislación vixente, o pleno extraordinario para a celebración da
moción de censura queda convocado para o luns día 7 de outubro ás 12:00
horas. Agardamos que neste pleno triunfe a democracia.
