O Concello de Zas iniciou unha nova fase de escavacións na leira Pedra do Altar de Brandomil, baixo a dirección do arqueólogo xalleiro Lino Gorgoso.
Este proxecto, que conta coa colaboración da Fundación Brandomil, avanza na súa cuarta fase, co obxectivo de ampliar e delimitar a domus romana descuberta durante as escavacións do verán pasado. As autoridades locais, incluíndo o alcalde Manuel Muíño e o tenente de alcalde José Brenlla, visitaron a zona, constatando o progreso positivo dos traballos.
A escavación actual busca, ademais de definir os límites da domus romana de grandes proporcións, decapar toda a superficie da leira, consolidar os muros existentes e secuenciar dúas vías romanas achadas en etapas anteriores.
Patrimonio arqueolóxico de Brandomil
Estes traballos son parte do compromiso do goberno local, para conservar e valorizar o patrimonio arqueolóxico de Brandomil. Ata o momento, o Concello investiu case 100.000 euros en diversas actuacións para protexer e poñer en valor a riqueza histórica da zona.
Entre os achados máis destacados das intervencións anteriores atópanse un tramo do Camiño Real que conectaba Negreira con Muxía, situado preto da antiga ponte, e as estruturas da Pedra do Altar, que as probas de Carbono-14 dataron entre o século I e principios do século II da nosa era.
