O presidente da Deputación provincial da Coruña, Valentín González Formoso, comunicou ao alcalde de Santa Comba, Alberto Romar, a intención de realizar melloras na estrada de Santa Comba a Coristanco (DP-2904), atendendo ás demandas do executivo local.
Desde o goberno provincial pretenden levar a cabo “unha actuación por fases coa prioridade de estudar a mellora da curva situada á altura de Amarelle”, situada no quilómetro 17 da estrada.
Como indican desde o goberno provincial “trátase dun punto especialmente perigoso, para o que se analizará a viabilidade dun trazado alternativo”.
Outro treito que se pretende mellorar é o das curvas situadas nas inmediacións de Almacenes Recarey, á altura de Padreiro (Castriz).
Segundo explicou Valentín González Formoso, a actuación sobre este punto, situado no quilómetro 15 da vía, ocuparía o segundo lugar na orde de prioridades da Deputación á hora de acometer melloras na seguridade viaria da DP-2904.
Xunto co alcalde, tamén participou na xuntanza o concelleiro de Obras, Pablo Negreira Souto.
