A emisora local Radio Xallas está en campaña electoral. Non se presenta ás eleccións pero quere ofrecer a posibilidade de que os seus ouvintes poidan escoitar ás distintas opcións.
Alberto Romar: «A pluralidade é un sinal de identidade de Radio Xallas»
O director da radio, Xosé Manuel Lema, contactou con representantes das dez formacións que se presentan pola provincia coruñesa. “Non é sinxelo cadrar as axendas, pero xa temos confirmación de todos os partidos e polo tanto estamos orgullosos de dar voz a tódalas opcións”. Para Lema é “un exercicio democrático” e resulta “motivador que “desde o goberno local respaldaran esta aposta”.
Unha idea que apoia o alcalde xalleiro, Alberto Romar: “A pluralidade é unha seña de identidade de Radio Xallas. Así entendemos nós os medios, que sexan cercanos, participativos e abertos”.
Conscientes da repercusión comarcal tanto polo 107.5FM como por internet www.santacomba.es, e a audiencia fiel a través dos Podcast en Ivoox e Spotify, Radio Xallas quere situar a Santa Comba como capital da comunicación e como nexo entre Xallas, a Costa da Morte e a área de Compostela.
“Somos un cruce de camiños, un pobo de intercambio social e cultural, e queremos escoitar todas as voces e dar cabida a tódalas opinións. E as eleccións son unha ocasión de amosar o talante xalleiro” sentencia Romar.
Visita de Ana Pontón e rolda de entrevistas
Con este amplo operativo electoral terán voz nas ondas xalleiras non só o Partido Popular, BNG ou PSOE. Tamén Sumar, Podemos, Vox, Espazo Común, PACMA, Por un Mundo Máis Xusto, e Escaños en Branco. Tódalas opcións que se presentan os comicios do 18 de febreiro.
De feito a “caravana radiofónica xa comezou”. Convidáronse os 10 partidos e tamén, a maiores os líderes das tres forzas con representación.
A candidata a presidencia da Xunta polo BNG, Ana Pontón visitou os estudios de Radio Xallas o pasado de 29 de xaneiro, o candidato socialista Xosé Ramón Gómez Besteiro intervirá, vía telefónica este xoves, e polo PP, a secretaria xeral Paula Prado recibiu ao director da emisora na sede de Santiago.
Esta semana xa participaron no programa as candidatas Luísa Feijoo e Teresa Castro(Espazo Común Galeguista), Marina Fernández(Por Un Mundo Máis Xusto) e Isabel Faraldo (Podemos Galicia) e este xoves o líder socialista e o número 2 do PACMA pola provincia coruñesa, Adrián Abuín. O venres será a quenda dun representantes de Escanos en Branco.
A vindeira semana terá como protagonistas a candidatos de Vox e de Sumar, para rematar con candidatos provinciais de PSOE, BNG e Partido Popular.
