Mazaricos vivirá unhas fantásticas festas de Nadal onde salientan a Carreira do Leite e a Gran Tractorada de Reis
O Concello de Mazaricos elaborou un amplo e variado programa de Nadal co que celebrar estas festas tan especiais para a veciñanza. Espectáculos, festas e as tradicionais Carreira do Leite e Gran Tractorada de Reis conforman un programa para todos os gustos e idades.
A programación dá comezo na tarde deste sábado, 16 de decembro, co festival de Nadal da Escola de Música Moderna de Mazaricos. Será ás 5 da tarde na Casa de Cultura, na Picota, con entrada libre.
O martes 26 de decembro, a partir das 5 da tarde, as máis pequenas e pequenos da casa teñen unha cita na Festa Infantil que se celebrará no recinto feiral da Picota. Haberá inchables e moitas sorpresas para a rapazada.
O venres 29, a Casa de Cultura acolle a presentación do libro «Médicos e medicina na Costa da Morte. A figura do doutor Pérez Maroño». Estará presente o autor, Braulio Pérez Astray, e terá lugar ás 7 da tarde. O libro recolle parte da vida e as lembranzas nos lugares, aldeas e vilas da Costa da Morte do doutor Manuel Pérez Maroño, natural de Mazaricos.
A compañía Malasombra representa o seu espectáculo «Os fabulosos cleaners» o sábado 30 de decembro ás 5 da tarde na Casa de Cultura. É un sensacional espectáculo para todos os públicos con teatro e pompas de xabón. A entrada é libre.
Carreira do Leite de Mazaricos
O 31 de decembro celébrase a xa emblemática Carreira do Leite de Mazaricos, que acada a súa sexta edición. Corredores de todas as idades porán o broche ao ano cunha carreira onde prima a diversión e onde a organización anima un ano máis a utilizar disfraces e enfeites.
A carreira, con catro categorías de idade, comeza ás 11 da mañá na Picota e as inscricións xa se atopan abertas online. Cando remate, celebrarase o VII Brinde Leiteiro de Mazaricos, onde está convidada toda a veciñanza. Trátase dunha celebración de despedida do ano e exaltación do produto máis senlleiro de Mazaricos: o noso leite.
A noite de Reis é unha das máis especiais do ano para a rapazada. A tarde previa, 5 de xaneiro, as súas maxestades os Reis Magos de Oriente visitarán Mazaricos e percorrerán as rúas da Picota nunha Gran Tractorada de Reis. Partirá do recinto feiral ás 5 da tarde. Haberá agasallos para a rapazada e compartirase unha estupenda chocolatada.
Conciliación
O Concello ofrece un ano máis servizos de conciliación para as familias. O programa Conciliamos no Nadal celebrarase os días 26, 37, 28 e 29 de decembro, alén do 2,3, 4 e 5 de xaneiro. Incluirá actividades para a rapazada de infantil e primaria, en horario de 9 da mañá a 4 da tarde.
NOTA DE PRENSA CONCELLO DE MAZARICOS
