Santa Comba adhírese á Asociación de concellos do Camiño de Fisterra e Muxía. Pleno ordinario celebrado en Santa Comba.
O pleno de Santa Comba comezou cunha declaración polo 25 de novembro a cargo da concelleira, Estefanía Calvelo. Sen moito debate aprobouse a adhesión do concello ao plan antifraude “Premadecor” da Deputación. Votou a favor o PSOE e abstívose o PP.
E por unanimidade aprobáronse unhas modificacións na ordenanza do IVTM. A concelleira Estefanía Calvelo(PSOE) explicou que se trataba de “facilitar un trámite as persoas con mobilidade reducida”, para que non teñan que realizar a renovación anual. Tamén se reformou a linguaxe da ordenanza.
Como estaba previsto aprobouse a adhesión do concello a Asociación de concellos do Camiño de Fisterra e Muxía. Noelia Baleato(PSOE)lembrou a importancia da ruta e que só este ano pasaron 23.000 persoas polo municipio.
A portavoz do PP, María Pose, queixouse pola falta de información nos distintos puntos:”Parece que veñen a acabar pronto”. O alcalde, Alberto Romar, recriminou algunhas das expresións usadas pola ex-alcaldesa.
Desde o PP xustificaron a non presentación de mocións “para que vostedes as rexeiten”. Romar convidou aos populares a presentar iniciativas pero advertiu que “nós decidiremos democraticamente o rumbo que sigue este pleno”.
No treito final do pleno, María Pose declarou que no concello “non se ve traballo polo pobo, están cobrando para nada”. O mandatario respostou que “o traballo vese na rúa”.
Procesos de selección de persoal
O punto máis polémico foi cando a portavoz do PP, con respecto a un proceso de selección de persoal dixo:”Parece ser que xa houbo reclamacións e alguén di que os procesos non foron tan legais”, referíndose a exames onde supostamente “alguén que non pasou a proba física, si que se dou por aprobado”.
Estas afirmacións levaron a Alberto Romar a avanzar que consultaría a asesoría xurídica do concello para “tomar medidas contra a señora Pose”, asegurando que “o proceso foi totalmente transparente”.Lamentou que a voceira popular estea «cruzando liñas”.
