Diferentes incidencias na provincia coruñesa nas últimas horas. A maior parte das 112 intervencións estiveron relacionadas cos asolagamentos en rúas, estradas, vivendas, baixos e garaxes.
Segundo informaron desde AXEGA 112 en Dumbría, a estrada provincial DP-2302, ao paso por Buxantes, está cortada debido a un movemento de terra, pedras e vexetación que bloqueou completamente o acceso a un garaxe con dous coches atrapados e tres cans desaparecidos.
De momento, ningunha persoa resultou ferida, pero os danos son importantes, xa que estamos a falar dun desprendemento de quince metros.
Desde que o 112 Galicia recibiu o aviso por esta situación ás 22:30 horas de onte, activáronse os seguintes medios de intervención: Bombeiros de Cee, axentes da Garda Civil de Tráfico, autoridades locais e equipos da limpeza e mantemento da Deputación da Coruña como titular da vía.
Con diferencia, a provincia da Coruña acumulou o maior número de incidencias relacionadas con este episodio (172), e os concellos máis afectados foron Fene, Neda, Ferrol, Narón, Mugardos, Ares, Cabanas, Miño, Pontedeume, Outes, Dumbría e Mazaricos.
Foto- Bombeiros Costa da Morte
