Así o anunciou Valentín González Formoso en Santa Comba
O vindeiro sábado 21 de outubro celebrarase en Santa Comba o Día Internacional da Muller Rural organizado pola Deputación e Fademur.
Nunha visita realizada este luns a Santa Comba, o presidente da institución provincial, Valentín González Formoso, fixo o anuncio acompañado polo alcalde Alberto Romar, polas deputadas de Politica Social e Educación, Mar García Vidal, e de Mar e Medio Rural, Cristina Capelán, e de varias concelleiras e concelleiros do goberno municipal.
«Ningún lugar mellor que Santa Comba»
Está prevista a participación dunhas 600 mulleres. “Ningún lugar mellor que Santa Comba para celebralo pola tradición agrograndeira do municipio e desta comarca, na que se concentran o maior número de explotacións da provincia” declarou González Formoso.
O alcalde Alberto Romar agradeceu que a Deputación elixira Santa Comba para conmemorar o Día da Muller Rural 2023 e subliñou o importante papel que, ao longo da historia, veñen desenvolvendo as mulleres de Santa Comba na economía familiar e na dinamización do rural.
Na súa estadía en Santa Comba, o Presidente da Deputación visitou a Capela da Virxe das Mercedes, en Vilar de Céltigos e supervisou obras como a pavimentación de viais en Alón e Alón de Abaixo.
O impulso do Plan Único
Formoso manifestou que o Plan Único da Deputación «supuxo un importante impulso para a mellora e creación de novas infraestruturas municipais en concellos como Santa Comba».
explicou que, desde a súa creación en 2017, o POS+ leva investido máis de 10 millóns de euros en Santa Comba, dos que máis de 9 millóns foron destinados á financiar 60 obras e preto de 400.000 euros a gasto social.