As obras da Senda do Xallas, o ambicioso proxecto turístico que enlazará os concellos de Mazaricos, Zas e Santa Comba á beira deste emblemático río, será unha realidade en breve.
Este atractivo turístico, que require dun investimento total próximo aos 700.000 euros, presentarase proximamente no Pleno da Deputación para que o organismo provincial dea luz verde ao financiamento. Isto permitirá ao Concello contratar as obras na vindeira primavera.
Xuntanza co alcalde de Mazaricos
Este é o resultado máis salientable da reunión que mantiveron o pasado mércores o alcalde de Mazaricos, Juan Blanco, xunto co concelleiro de Turismo, Jorge Sanmartín, co deputado de Turismo do ente provincial e vicepresidente do mesmo, Xosé Regueira.
Por outra banda, a Deputación e o Concello comprometéronse a seguir colaborando na promoción turística. Mazaricos estará presente a través do stand da Deputación en próximos eventos turísticos e gastronómicos, caso do Xantar Ourense, Foro Fairway, Fitur ou Intur.
O alcalde de Mazaricos, Juan Blanco, agradeceu a receptividade e boa disposición da Deputación para desenvolver este importante proxecto en Mazaricos, «un dos destinos turísticos da Costa da Morte en auxe».
Pola súa banda, o concelleiro Jorge Sanmartín considerou que «a presenza de Mazaricos en foros de turismo con vocación internacional está a axudarnos moito para acadar estas boas cifras», polo que valorou moi positivamente continuar neste modelo de colaboración e complementariedade entre institucións.
Fonte- Nota de prensa do concello de Mazaricos
