Sobre o vertido detectado este martes na zona do paseo marítimo de Camariñas, o concello de Camariñas informou que “os servizos municipais levantaron as tapas da rede de sumidoiros para comprobar a súa orixe, pero non se puido determinar exactamente onde comezaba o mesmo.”.
«Unha mancha branca, semellante a pintura comercial»
Indican que era “unha mancha branca, semellante a pintura comercial”. E fan un chamamento “para que este tipo de actos incívicos non se produzan, xa que supoñen un dano tremendamente importante ó medio ambiente”.
A alcaldesa, Sandra Insua anunciou que encargarán “unha memoria para solventar as incidencias que ocorren tanto na zona do Canzorro como do Bar Playa, e solicitaremos axuda a Augas de Galicia para que o proxecto de conexión á depuradora destes dous puntos sexa unha realidade».
No día de onte, desde o Partido Popular local, tamén pedían unha solución a estes problemas: «Os gobernantes cobran para dar solucións. Camariñas non pode dar esta imaxe cara o mundo. Non podemos vivir de costas ó mar, a saúde, o medio ambiente e ó turismo. Isto ten que ser unha prioridade».
