Foto-Unidas Podemos Laxe
O BNG de Laxe levará a pleno “o caos de tráfico, circulación e de aparcamento” de Laxe.
Para o portavoz municipal, Xosé Manuel Pose, é “incomprensible que o Partido Popular siga cruzado de brazos ante un problema que o pobo soporta desde hai anos, sen que o equipo de goberno tome ningunha medida, non sabemos se por incompetencia, por pasotismo ou polas dúas razóns. Pero quen paga esta incompetencia é a veciñanza. Tivemos catro anos perdidos nesta materia e parece que o Goberno de Pérez Añón vai polo mesmo camiño, por iso desde o BNG tomamos a iniciativa levando este asunto a pleno”.
Lembran que hai un plan de tráfico aprobado que non se chegou a executar.
Consideran importante “reordenar a circulación nas rúas do casco urbano, aparcamentos disuasorios que quiten o exceso de coches do centro, aumentar as prazas de estacionamento para persoas con mobilidade reducida e espazos de aparcamento específico para motos, bicis, autobuses e caravanas”.
Os nacionalistas queren que haxa unha correcta sinalización dos aparcamentos sendo prioritario “re-deseñar o sentido da circulación das rúas no casco urbano para mellorar a tráfico interno de vehículos no concello, previa consulta coa veciñanza caso a caso”.
Segundo explica Pose “no BNG temos propostas para darlle solución a un problema que afecta de cheo á veciñanza e conseguir un Laxe que funcione ante a falta de medidas por parte do equipo de goberno”.
Unidas Podemos pide que se cumpra a ordenanza de tráfico
Pola súa banda, Unidas Podemos esixe o cumprimento da Ordenanza Municipal de tráfico e incide na necesidade dun plan de regulación de leste en Laxe.
O edil Fernando do Moral Regaldie opina que é unha cuestión “urxente”. Fanse eco dun accidente (achegan foto) e aseguran que recolleron “diversas queixas dos veciños pola alta velocidade coa que circulan vehículos na única estrada que atravesa o pobo xunto ao paseo marítimo e que termina no porto”.
UP propón aparcamentos disuasorios “á entrada do pobo non opcionais, e o acceso ao centro urbano debe limitarse a residentes, servizos e portos”.
