Informa AXEGA 112
Ponteceso (Foto Bombeiros de Carballo)
Os Bombeiros de Carballo e o GES de Ponteceso excarceraron ao condutor e único ocupante do vehículo, coa colaboración dos membros da Agrupación de Voluntarios de Protección Civil da localidade. Posteriormente, a persoa ferida foi trasladada ao Punto de Atención Continuada de referencia nunha ambulancia.
O accidente produciuse no quilómetro 5 da AC-419, ás 21:00 horas da pasada noite. Foi unha persoa particular quen contactou co 112 Galicia, nese momento, para dar conta do accidente.
Axiña, desde o 112 Galicia púxose a situación en coñecemento de Urxencias Sanitarias de Galicia-061, dos Bombeiros de Carballo, do GES de Ponteceso, da Garda Civil de Tráfico, de Protección Civil e do servizo de mantemento da estrada.
Rescate en Dumbría
Por outra banda, unha persoa caeu do paseo marítimo do lugar de Ézaro a unha zona rochosa, desde unha altura de dous metros. Os Bombeiros de Cee utilizaron unha padiola para evacuala ao lugar onde se encontraba a ambulancia. Posteriormente, foi evacuada ao Hospital de Cee con feridas na cara.
O suceso rexistrouse no 112 Galicia uns minutos despois das 00:15 horas da pasada noite, a través da comunicación dunha persoa particular.
Acto seguido, os xestores do 112 Galicia requiriron a intervención de Urxencias Sanitarias de Galicia-061, da Garda Civil e dos Bombeiros de Cee.
