A celebración gastronómica de maior relevancia e tradición do municipio, a Festa das Cereixas de Paiosaco, celebrarase na fin de semana do 1 e 2 de xullo. O alcalde, José Manuel López Varela e a edil Patricia Bello en representación do Concello, e parte das integrantes da Comisión de Festas de Paiosaco, presentaron o programa desta festa declarada de Interese Turístico de Galicia nun acto celebrado no campo da feira da localidade.
Puzzle, Impacto e DJ Rokiño
O sábado 1 de xullo a festa comezará coa sesión vermú a cargo do grupo Puzzle, que tamén actuará na verbena nocturna que rematará coa Disco Móbil Impacto e o DJ Rokiño. Á tarde, oitava edición do Aberto das Cereixas de billarda a cargo do Club Billarda Campo da Feira.
Xa o domingo, no propio día da Feira das Cereixas, a charanga dos Kilombertos de Monte Alto amenizará a xornada de feira. Na sesión vermú actuará o Dúo Charada.
A partir das 18:00 horas a Asociación Cultural Queiroga de Paiosaco ofrecerá un espectáculo de música e baile tradicionais galegos.
Concerto de Sés
Pola noite, a partir das 21:30 horas, porase o broche de ouro á Feira das Cereixas co concerto de Sés. A cantautora coruñesa, moi vinculada á comarca de Bergantiños, actuará por primeira vez no municipio por iniciativa do Concello, e será cos temas do seu último disco Diante un eco.
Ao remate do concerto haberá fogos artificiais. Ademais, a Comisión de Festas de Paiosaco está a ultimar unha derradeira actuación para a noite do domingo coa que se pechará o programa e que se anunciará en breve nas súas redes sociais.
Na organización da Feira das Cereixas de Paiosaco, Festa de Interese Turístico de Galicia, o Concello da Laracha e a Comisión de Festas de Paiosaco contan coa colaboración da Deputación da Coruña, a Xunta de Galicia e Abanca.
