As quendas das grandes festas do verán chega a comarca e dentro destas nun capítulo destacado pola súa singularidade están aquelas declaradas festas de interese turístico de Galicia.
A declaración destes eventos ademáis da promoción institucional leva consigo un aporte económico cada ano para os concellos que o soliciten. A Axencia de Turismo de Galicia que ata agora dirixía Nava Castro repartiu este ano 400.000 euros para estes eventos, destinando tres mil euros a cada concello.
Varias festas na Costa da Morte
Na Costa da Morte recibiron esta axuda o Asalto ao Castelo e Vimianzo, a Festa do Percebe do Roncudo de Corme-Ponteceso, a Mostra de Encaixe de Camariñas, a Romaría de Santo Hadrián de Malpica, a Festa do Naufraxio de Laxe e a Festa das Cereixas de Paiosaco-A Laracha.
Os concellos só poden facer una solicitude, e aínda que é un feito inusual que nun municipio teñan dous festexos de interese turístico o caso sí se da en Vimianzo onde tamén contan coa Faguía de Carnés.
Ata agora era a única declarada no municipio, desde 2010, e por iso recibía o Concello de Vimianzo entre 3000 e 4.500 euros de subvención. Este ano as autoridades municipais decidiron pedir a axuda para a promocion do Asalto, que o ano pasado entrou na lista dos grandes eventos de Galicia.