O restaurante Casa Jurjo acolleu a II Xornada de Turismo de Mazaricos, onde participaron diferentes persoeiros que coincidiron en valorar as potencialidades da Costa da Morte e na necesidade de apostar pola calidade.
O alcalde de Mazaricos, Juan Blanco, puxo como exemplo o traballo desenvolvido no seu concello e tamén as posibilidades que oferta o futuro con proxectos como o da Senda do Xallas.
O Vicepresidente da Deputación, Xosé Regueira reivindicou ese compromiso “por un turismo de calidade” na zona: “Non facemos tan mal as cousas. O gran éxito foi que nun momento de pandemia soubemos compenetrarnos e cooperar” sinalou.
Regueira ten claro que somos “un territorio diverso, cun equilibrio interior-costa, somos un destino potente”.
O presidente do GDR Costa da Morte e alcalde de Zas, Manuel Muíño, explicou o traballo feito coa marca de territorio “Costa da Morte, Terra Atlántica” e demandou unha planificación:”Todos collemos no territorio pero hai que ordenarse”.
Pola súa banda a presidenta da CMAT e alcaldesa de Vimianzo, Mónica Rodríguez falou do traballo deste ente, con plan estratéxico e coa aposta “por formar a nosa xente para dar a coñecer a riqueza que temos”.
Desde a asociación Solpor, Jesús Picallo tamén, se referiu a iniciativas como as credenciais do camiño e incidiu no importante atractivo que pode supor a atracción dos chamados “nómadas dixitais”.
Pepe Formoso, presidente de APTCM, declarou que “o gran problema que temos na Costa da Morte é a falta de autoestima”, e amosouse convencido que a zona “ten todo” para a “desestacionalización”.
Foron distintas voces, distintas opinións. Como tamén a de Cesáreo Pardal (presidente do Clúster de Turismo) que chamou a apostar pola conxunción da paisaxe e a gastronomía.
O xerente de Casa Grande de Xanceda, Guillermo Martínez, expuxo a historia desta granxa ecolóxica de Mesía que diversificou a súa actividade cara á transformación do leite e, máis recentemente, as visitas ao complexo dentro dunha estratexia de potenciación e reivindicación do ecolóxico e o rural.
Finalmente, os travel bloggers Beatriz Sotelo e Alberto Ribas, de Petiscos Galegos e Alvientooo, deron o seu punto de vista profesional sobre as oportunidades e os puntos a mellorar da Costa da Morte como destino turístico.
Ao remate do acto, o concelleiro de Turismo, Jorge Sanmartín, agradeceu a participación de poñentes e asistentes e asegurou que «Mazaricos vai continuar medrando e destacándose como un destino referencial, sempre en comunicación con outros territorios da Costa da Morte».
Posteriormente, compartiuse unha degustación de produtos mazaricáns.
