O xalleiro Xosé Abelenda é o novo responsable do BNG na Suíza. Substitúe a Baldo Álvarez, un veterano militante na diáspora que retorna a terras galegas.
Este sindicalista e inspector de traballo natural de Grixoa de Esternande leva anos de intensa militancia no nacionalismo, e involucrado en diferentes reivindicacións tanto en Galicia como na confederación helvética.
É un importante activista sempre atento a comprometerse, ben sexa nunha problemática laboral (aínda que teña en fronte unha multinacional téxtil) ou a necesidade de mellorar as infraestruturas no seu concello natal, Santa Comba.
Este nomeamento colleu relevancia coincidindo coa visita da portavoz nacional do BNG, Ana Pontón e da eurodeputada Ana Miranda ao país dos reloxos.
Declaracións de Abelenda en Adiante Galicia
En declaracións a Adiante Galicia, Abelenda valorou “moi positivamente” o nomeamento, e reiterou a súa vontade de “traballar pola defensa polos galegos que estamos na emigración e da xente en xeral”.
Manifestou que o desexo dos membros da diáspora é o de “retornar á terra” e de que “se respecten os nosos dereitos como emigrantes”, facilitando trámites e acabando coa discriminación fiscal existente.
Aplaudiu a iniciativa do BNG para que se habilite unha oficina de representación na Suíza “unha demanda que xa pedira a colectividade galega nos anos 90 e a ver se agora vai adiante”.
Abelenda tivo palabras de eloxio para o seu antecesor, Baldo Álvarez “que fixo moitísimo pola colectividade galega e pola nosa cultura”.
Na foto de portada, Ana Miranda, Xesús Gómez, Xosé Abelenda (no centro), Ana Pontón e Francisco Nogueiras.
