Coincidindo coa visita que a conselleira do Mar, Rosa Quintana, realizará a Muxía para participar no acto de presentación da candidatura do Partido Popular, o alcalde de Muxía e secretario xeral do PSOE local, Iago Toba, ofreceulle as dependencias municipais “para tratar e intentar poñer solución ante a grave situación que está a vivir o sector percebeiro da vila da Barca”.
Así, o alcalde ofrécese a ser intermediario xa que considera que “a intención da conselleira é o de resolver o problema e o dos percebeiros é simplemente que se respete o acordo que había nun principio, onde as zonas protexidas se sigan protexendo”.
Aproveitar a visita da conselleira
“Podemos aproveitar a visita da conselleira á nosa vila para facer un encontro e alcanzar un acordo que beneficie a todas as partes. Aínda que o sector percebeiro se manifestase esta mesma mañá en Santiago, este equipo de Goberno sempre ten a mano tendida para chegar a calquera acordo e compromiso que beneficie a Muxía e ás súas xentes”, destacou Toba.
Para rematar, o alcalde puxo sobre a mesa que “xa que a candidata do Partido Popular de Muxía, Sandra Vilela, simplemente ten interese en defender á Xunta para manterse no seu posto dentro do seu partido, este goberno si que vai loitar por defender os intereses da nosa veciñanza e dun sector moi maltratado e fundamental que está a pasar por unha situación moi complicada”.
