En Cabana de Bergantiños tivo lugar a presentación das candidatas e candidatos do BNG na comarca de Bergantiños coa presenza da portavoz nacional Ana Pontón.
Cabezas de lista en Bergantiños
A líder do Bloque estivo acompañada por Evencio Ferrero (Carballo), Carolina Castiñeiras (A Laracha), Xosé Antonio Andrade (Coristanco), Tatiana Rellán (Cabana de Bergantiños), Miguel Varela (Malpica de Bergantiños), Fátima Rodríguez (Ponteceso) e Xosé Manuel Pose (Laxe).
“O BNG, onde goberna, demostra que ten un modelo municipal transformador que fai avanzar en positivo” declarou. E puxo como exemplo o concello de Carballo que “é un referente en Galiza polo seu urbanismo sostible e á medida das persoas, pola recuperación e a cohesión dos barrios ou polos servizos públicos que ofrece”.
«O modelo de Carballo»
Pontón continuou:“Carballo destaca tamén polas súas políticas feministas e a favor da igualdade social, polo seu gran tecido empresarial e comercial, pola conservación do medio ambiente, polo seu espectacular dinamismo cultural e pola defensa da nosa lingua común, o galego”.
Neste contexto indicou que “o modelo de Carballo é o que o BNG quere para todo Bergantiños, con propostas en positivo, avanzadas, con determinación e con ilusión”.
O BNG afronta os comicios con optimismo: “É o momento de darlle unha oportunidade ao BNG o próximo 28M porque representamos o entusiasmo, o empuxe, a vitalidade e o optimismo que Galiza necesita. Estou convencida de que seremos a forza política que máis suba”, concluíu.