O secretario xeral do PSdeG, Valentín González Formoso, puxo como exemplo á Costa da Morte, onde hai maioría de gobernos socialistas e emprazou aos seus candidatos a “arremangarse” para “rematar co caciquismo” da comarca de Bergantiños.
Candidatos do PSOE en Bergantiños
Nun acto celebrado en Coristanco, expresou o seu apoio a aos candidatos á alcaldía de Laxe, Francisco Vidal, de Cabana, Juan Ramón Varela, de Malpica, Walter Pardo, da Laracha, Palomi Rodríguez, de Ponteceso, Lois García Carballido, de Carballo, Mari Carmen Vila, e o anfitrión de Coristanco, José Manuel Pérez Abelenda.
En clave xeral, González Formoso acusou a Rueda de ir “contra a historia de Galicia”, caracterizada polo “principio de solidariedade” onde “nunca ninguén deixou de botar unha man cando fai falla”.
Denuncia que o presidente da Xunta “equivócase ao facer seguidismo de Ayuso e Moreno Bonilla e actuar en favor dos millonarios. “Equivócase de país, isto non é Andalucía, aquí non hai señoritos andaluces; para buscar unha gran fortuna non hai que ir á feira de abril, senón á feira de Paiosaco”. Referiuse ao recurso da Xunta contra o imposto ás grandes fortunas.
Ao día seguinte de participar na presentación da candidatura de Mónica Rodríguez en Vimianzo, o secretario xeral dos socialistas reivindicou as eleccións municipais para seguir “construíndo país”.
