O BNG de Camariñas manifesta que coa decisión do goberno socialista (aprobada en pleno) de acollerse ao Fondo de Financiamento a Entidades Locais do Goberno e coa débeda recoñecida de 1.353.766,69 € e o período medio de pago a provedores “que o ano pasado chegou a sobrepasar os 140 días”, queda demostrada a mala xestión do executivo que preside Sandra Insua.
«Non son merecedores de cobrar catro dedicacións exclusivas»
“Quedou patente que a Alcaldesa e o seu equipo non son merecedores de cobrar catro dedicacións exclusivas,porque non se pode facer peor, a súa xestión ademais de nefasta, levounos á unha situación de quebra. Levan anos acumulando unha débeda, escondendo facturas no caixón, que imos ter que pagar todos os veciños, con impostos máis altos” declarou o candidato nacionalista Xurxo Rodríguez.
O BNG quere unha auditoría das contas
Rodríguez Baña adiantou que “co BNG liderando o próximo goberno, realizarase unha auditoría das contas municipais, para saber onde gastou a alcaldesa cada un dos euros do concello, o noso será un goberno marcado pola transparencia”.
Coa solicitude deste préstamo “o goberno local pretende maquillar unha situación insostible e aparentar que non pasou absolutamente nada nestes catro anos, onde nin con maioría absoluta foron capaces de aprobar anualmente os orzamentos”.
O portavoz nacionalista asegura que o goberno local “quería tapar o furado económico cos cartos que ía ingresar cos eólicos, por iso non lle importa que as eléctricas coloquen muíños en calquera parte do municipio, sen importarlle en absoluto a opinión da xente. Non puido ser, e agora temos que sumar un novo préstamo do Estado antes das eleccións para aparentar que as contas están saneadas, cando esta é unha operación para tapar “o raposo con fieitas”.
